都係講返教育舒服o的，而今次用埋廣東話o黎表達會更加o岩。先分享兩個小故事。
過年o個排，有一日我搭巴士去朋友度團拜，同站上車有對父女坐正o係我後面。本來都無咩o野好靜咁，但慢慢個爸爸開始出聲──唔算好大聲，但明顯比同隔離位講o野把聲大o的。內容大要係頭先上車o個陣，囡囡急住上車推撞到爸爸，爸爸慢慢分析返，如果你俾人好急咁推撞你有乜感覺，咁樣做o岩唔o岩，可唔可以有更好更有耐性o既處理方法云云。
都好普通o者，好多時候都發生啦，個爸爸無鬧小朋友算好啦……不過個爸爸係全程講英文的。我無乜聽到個囡囡點應爸爸，僅有o既回應係一兩句「唔」「哦」之類，唔係個爸爸落車前字正腔圓咁話「落車喇」，我真係以為佢地係ABC o黎。
第二個故事係來自身邊朋友o既。有日見完工搵朋友食晏，傾o左一陣偈一齊去接佢個仔放學。個小朋友都幾活躍，不過未至於四圍亂走，唔嗌佢都識返轉頭跟返大人。當我講講o下佢讚佢乖o個陣，我朋友分享話佢個仔有個同學，平時唔可以就咁叫佢名o家，唔係佢會唔應。
咁奇怪？嗌名都要有特別o既技巧？我朋友叫返佢個仔過o黎，等佢親自示範要點叫佢個同學。仲等我以為有咩特別，一開口，原來只係要用普通話o黎叫佢，唔係佢會唔應，而據我朋友透露，呢位同學係知道佢自己個名o既廣東話發音，即係佢知道人o地用緊廣東話嗌佢的。（呢位朋友，如果我有講錯，請指正返。）
香港，果然係國際大都會，乜都可以炒埋一碟。不過呢兩個例子算好喇，唔少家長教小朋友或者同小朋友溝通o個陣，中英夾雜。「好開心呢？o係度smile喎……happy！」「喂！唔淮咁！naughty！」「行快o的行快o的，faster faster！」唔講清楚，我真係以為o的大人同寵物講緊o野。你想製造個英文語境，俾小朋友快o的多o的接觸英文，都唔係咁搞法掛，斷卷殘章，中英夾雜，小朋友點會學得好呀，可能適得其反添呀。
有o的內地o黎o既小朋友，由於家庭背景問題，好多時候只識得用普通話溝通，老師因為要就佢o地，教書o個陣要中普夾雜。都算，有o的家長教小朋友o個陣，又係好似上面中英夾雜o既例子咁，撈亂哂o的o野o黎教，而有部分家長甚至自己普通話都係有限公司，都照亂發音教小朋友，第時教你o地小朋友個普通話老師真係多得你唔少。
歸根究底，都係優越心態帶o黎o既問題。香港絕大部分教育比較優質o既學校，都係用英文授課，學生英文唔夠好連行入學校門口面試都無機會，所以家長想盡快谷好小朋友o既英文能力，無可厚非。普通話當然係近年趨勢啦，一者愈來愈多內地人o黎，小朋友可以更容易同佢o地溝通，增進社交（或者內地人脈啦），二者都多o左學校面試o個陣，考埋小朋友識唔識普通話，背靠祖國嘛，識多樣ｏ野，點都俾其他小朋友秤先。
似乎大部分人忘記o左，學習其他語言o既目的，係想同其他用呢種語言o既人溝通到，溝通先係學語言o既目的嘛，幾時搞到咁變質咁功利？都算，但如果用錯方法，教到唔三唔四，小朋友細細個個底一打壞o左，再學上去就會混淆，甚至對學習o個種語言失去信心，咁就一世。
個個都係咁？有乜問題？問題係一路發生緊o既事情，唔代表一路都o岩o家喎，正常人應該識得反思，同埋提出質疑掛？
另一方面，o係香港生存生活，應該主要用廣東話掛？之前教育局個網都講啦（雖然篇文刪除o左），香港成九成七人用廣東話溝通o家喎。點解要迫小朋友用其他語言，唔多o的用最舒服，最能夠順暢表達意思o既母語──抽水才子陶傑譽為上帝恩賜o既廣東話？點解我地要逆向歧視、矮化自己o既母語？
早兩日睇無記o既新聞資訊節目，講一o的非華語學生點樣努力學習中文，希望融入香港社會，同埋令自己出路更好（雖然節目主線係探討非華語學生o既中文學習政策）。望返轉頭，我o地自己手握在地o既語言優勢，反而以其他語言為先，甚至因為要就其他外來人，無論語言同文字上，都要用人o地o個套去溝通……我未見過o的人去到其他地方，反而要人o地就我o地寫中文同講廣東話囉。
有o的離題添……點都好啦，其他語言係要學習，不過平日生活都係用返廣東語啦，唔係小朋友好唔適應，學其他語言又會學得唔好o家……
沒有留言:
張貼留言